Ադրբեջանի Պետական անվտանգության ծառայությունը հաղորդագրություն է տարածել նախկին առաջին փոխվարչապետ Աբաս Աբասովի նկատմամբ հետախուզում հայտարարելու մասին:
Նա մեղադրվում է նախագահի աշխատակազմի նախկին ղեկավար Մեհթիևի հետ «պետական հեղաշրջում և սահմանադրական կարգի տապալում կազմակերպելու փորձի» մեջ:
Ադրբեջանական լրատվամիջոցները, հղելով իրազեկ աղբյուրներին, հայտնում են, որ Աբասովը մի քանի ամիս առաջ «հարազատներին տեսակցելու համար Մոսկվայից մեկնել է Ստամբուլ, բայց իր նկատմամբ հետախուզում հայտարարելուց առաջ շտապ վերադարձել է և ներկայումս գտնվում է Ռուսաստանի Դաշնության տարածքում»:
Աբասովը, ինչպես աղբյուրներն են պարզել, թեև մոտ երկու տասնամյակ է, ինչ մշտապես բնակվում է Մոսկվայում և ՌԴ քաղաքացիություն ունի, ադրբեջանական քաղաքացիությունից չի հրաժարվել:
Ըստ երևույթին, Ադրբեջանի հատուկ ծառայությունները հույս են ունեցել, որ համապատասխան միջնորդության դեպքում Թուրքիայի իշխանությունները կարտոնեն Աբասովի ձերբակալությունը և արտահանձնումը:
Երևում է, Թուրքիայի նախագահ Էրդողանը ձեռնպահ է մնացել այդ սկանդալային գործին ներգրավվելուց, և Աբասովը Ստամբուլից անարգել վերադարձել է Ռուսաստան: Իշխանական minval politika-ն համոզված է, որ Ռուսաստանը «երբեք Աբասովին չի արտահանձնի, քանի որ նա սերտորեն կապված է Մոսկվայի և մարզի գործարար շրջանակների հետ, տեղի ադրբեջանական համայնքներում հեղինակություն է վայելում»:
Խնդիրն այս դեպքում Աբասովի անձը, նույնիսկ Մոսկվայի համար նրա կարևորությունը չէ: Նախագահի աշխատակազմի նախկին ղեկավար Մեհթիևի դեմ քրեական գործը կառուցված է Մոսկվայի հետ նրա համագործակցության վարկածի վրա:
Ըստ երեւույթին, նախկին առաջին փոխվարչապետ Աբասովը «գործով անցնում է որպես Մեհթիև-Կրեմլ կապող օղակ»: Այս պատճառով Պուտինը հազիվ թե նրան հանձնի Ալիևի «արդարադատությանը»:
Մանավանդ որ Ադրբեջանի ՊԱԾ-ը նախապես սպառնացել է, որ կհրապարակի «դավադրության կազմակերպումն ապացուցող տեսաձայնագրություններ»:
Ուշագրավն այս համատեքստում Էրդողանի պահվածքն է, եթե, իհարկե, նա տեղյակ է եղել, որ Աբասովը գտնվում է Ստամբուլում, և Ադրբեջանում նրա դեմ հետախուզում հայտարարելու որոշում է նախապատրաստվում: Բայց, երևում է, «Մեհթիևի գործը» Թուրքիայի համար այնքան էլ հաճելի չէ:
Թեև կայացվել է Միլլի մեջլիսի նախկին պատգամավոր Հաջիբեյլիին արտաքսելու որոշում, բայց առայժմ նա Թուրքիայում է: Հաջիբեյլին կասկածվում է «սահմանադրական կարգի տապալման փորձին» ներգրավվածության մեջ: Առանց Աբասովի ներգրավման «Մեհթիևի գործը», հավանաբար, կփլուզվի:
Բաց մի թողեք
Լիբիական ինքնաթիռի «հարձակմամբ սարքել են Թուրքիայի գլխին»
Թրամփի կենտրոնաասիական «ցատկը» Ուկրաինայի շուրջ ռուս-ամերիկյան ենթադրյալ «գործարքի մաս է»
Պուտինը «Նովոռուսիայից» ոչ մի քայլ ետ նահանջելու մտադրություն չունի