Իրանը զգուշորեն մեղմացնում է Թուրքիայի, Ադրբեջանի, Պարսից ծոցի արաբական միապետությունների և անգամ ԱՄՆ-ի հետ հարաբերությունների հռետորաբանությունը:
Նման եզրակացության է եկել Թուրքիայի Իրանական հետազոտությունների կենտրոնը, որի տարեկան ամփոփ վերլուծությունը հրապարակվել է դեկտեմբերի 10-ին:
Ուշագրավ է, որ այդ մասին «Անադոլու» գործակալության ընդարձակ տեղեկատվությունը գրեթե անփոփոխ տարածել են նաև Բաքվի իշխանական լրատվամիջոցները:
Թուրք վերլուծաբաններն, ընդսմին, համոզված են, որ Իրանի արտաքին քաղաքական հռետորաբանության մեղմացումը պայմանավորված չէ «իսլամական գաղափարաբանությունից հրաժարվելու» հանգամանքով: Նրանք գտնում են, որ Թեհրանը հարկադրված է «հաշվի նստել իրողությունների հետ և ընտրել նոր առաջնահերթություններ»:
Վերլուծականը թեկուզ անուղղակի, բայց պարզորոշ արձանագրում է, որ Թեհրանի համար «իսլամական հեղափոխության արտահանումը դարձել է անիրագործելի», գլխավոր խնդիր է դարձել «ազգային պետության կառուցումը», ինչը «ստիպում է հրաժարվել մշտական հակամարտության քաղաքական ուղեգծից»:
Վերլուծականից արվում է չափազանց ինտրիգային եզրակացություն: Իրանի «փոխակերպումը» ոչ թե «համոզմունքների վերանայման, այլ կործանումից խուսափելու հնարավորության որոնման արդյունք է»:
Որպես հիմնավորում, թուրք վերլուծաբաններն ընդգծում են նաև «Հարավային Կովկասում ռազմավարական ազդեցության խորքի կորուստը», որ Իրանն ունեցել է քառասունչորսօրյա պատերազմից հետո:
Պետք է համոզված լինել, որ Իրանական հետազոտությունների կենտրոնի տարեկան վերլուծությունը մամուլում միայն մասնակիորեն է տարածվել, ավելի խորքային եզրահանգումները հասցեագրվել են Թուրքիայի, հավանական է՝ նաև Ադրբեջանի պատկան մարմիններին:
Բայց հրապարակային շեշտադրումներն էլ բավական են, որպեսզի պարզ լինի, որ Անկարան և Բաքուն Թեհրանի հետ հարաբերություններում հանդես են գալիս Իրանի «ազգային պետության կառուցման աջակցի» դիրքերից:
Իրանում էթնիկ երկրորդ տարրը թուրքական է, որ երկրի պետական կառավարման համակարգում պատմականորեն ազդեցիկ մասնակցություն է ունեցել: Ադրբեջանում նույնիսկ Սևֆյան և Ղաջարական արքայատոհմերն անվանում են «թուրքական»:
Նախագահի պաշտոնում էթնիկ թուրք Փեզեշքիանի ընտրությունը Բաքվում գնահատում են «Իրանի փլուզումը կանխելուն ուղղված որոշում»:
Բաքու այցից հետո Իրանի արտաքին գործերի նախարար Արաղչին Irna գործակալությանն ասել է, որ «կողմերը մտադրված են հարաբերությունները բարձրացնել ռազմավարական գործընկերության մակարդակի»:
Ավելի քան երեք տասնամյակ Հայաստանում արտաքին քաղաքական որևէ որոշում պայմանավորվել է Իրանի հավանական արձագանքով: Ինստիտուցիոնալ և արտախորհրդարանական ընդդիմությունը շարունակում է Իրանի հետ ռազմավարական գործընկերության քարոզչություն իրականացնել:
Հարևան երկրի հետ բարիդրացիական հարաբերություններն, իհարկե, Հայաստանի համար կարևոր են: Բայց հաշվարկից դուրս չպետք է թողնել, որ Իրանը կարող է «թուրքական փոխակերպման ենթարկվել»:
Բաց մի թողեք
«Ամերիկյան խաղաղության դարաշրջանը Եվրոպայի եւ Գերմանիայի համար ավարտվել է». Մերց
Տասնյակ հազարավոր մարդիկ բողոքի ցույց են անցկացրել Բուդապեշտում՝ Հունգարիա. Լուսանկարներ
Պատերազմը չէր լինի, եթե Կառավարության ղեկավարը խնդրո առարկա կարգավորման փաթեթին ընթացք տար