Ի՞նչ կարող է փոխվել, եթե Թրամփ – Պուտին գագաթաժողովից «ծուխն» է մնում

Պեկինում Չինաստանի և Միացյալ Նահանգների առաջնորդների բանակցությունները տեւել են երկու ժամ տասհինգ րոպե։

Սպիտակ տան պաշտոնական հաղորդագրությունից դատելով, Դոնալդ Թրամփը դիվանագիտական զգալի հաջողություն է արձանագրել, ԱՄՆ-ը և Չինաստանը համակարծիք են, որ Իրանը «երբեք միջուկային զենք չպետք է ունենա, իսկ Հորմուզի նեղուցը պետք է միջազգային նավագնացության համար բաց լինի»։

Ամերիկյան կողմը այլ էական տեղեկություն չի տարածել, ինչից հասկացվում է, որ Թրամփի Չինաստան այցի գլխավոր նպատակը Իրանի շուրջ և առհասարակ Մերձավոր Արևելքի իրավիճակի հարցում Պեկինի առնվազն լոյալությունն է։ Եվ նա, կարծես, այդ նպատակին հասել է։

ԱՄՆ նախագահի Չինաստան այցով, կարծես, ուկրաինական կարգավորման նրա միջնորդությունը սպառվել է։ Պեկին ուղեւորվելուց առաջ Թրամփը հերքել է տեղեկությունը, թե Դոնբասից ուկրաինական զորքերը դուրս բերելու հարցում ինքը Ռուսաստանի նախագահի հետ պայմանավորվածություն ունի, իսկ Սի Ծինփինի հետ նրա բանակցություններից հետո ռուսաստանյան ՌԻԱ Նովոստին խմբագրական հոդվածով հասկացրել է, որ անցյալ տարի Անքորիջում «ձեռք բերված պայմանավորվածություններից միայն ծուխն է մնացել»։

Հեղինակը, սակայն, այդ «ծուխը հաճելի» է գնահատել, քանի որ, նրա ձևակերպմամբ՝ «հյուծիչ պատերազմում աշխարհի երկու առաջատար տնտեսության երկրներից մեկը թշնամուց դարձնել ընդդիմախոս՝ ցանկացած խոսքերից ավելի թանկ» է։

Խոսքը, անկասկած, Միացյալ Նահանգների մասին է, որ դադարեցրել է Ուկրաինային ֆինանսական աջակցությունը։ Իրողություն է, որ ամերիկյան սպառազինությունները Ուկրաինա են հասնում եվրոպական երկրների միջոցով և նրանց ուղղակի վճարումների դիմաց։

Ըստ լրատվամիջոցի, Թրամփը «ջանացել է Զելենսկուն համոզել, բայց եթե չի հաջողել, ողբերգություն» չէ, որովհետև Ռուսաստանի նախագահի օգնական Ուշակովը հասկացրել է, որ Կիևում «լավ գիտեն, թե ինչ պետք է անեն, որպեսզի պատերազմը ավարտվի»։ ՌԻԱ-Նովոստին, ընդսմին, պարզաբանել է, որ «խոսքը բոլոր տարածքների մասին» է։

Դժվար է կողմնորոշվել՝ Միացյալ Նահանգները ուկրաինական կարգավորման գործընթացից դուրս է գալիս, որպեսզի Ռուսաստանի՞, թե՞ Ուկրաինայի և նրա եվրոպական դաշնակիցների ձեռքերն ազատվեն, բայց, կարծես, պարզ է դառնում, որ Թրամփը, Սի Ծինփինը և Պուտինը նոր աշխարհակարգի «ճարտարապետներ» չեն դառնա։

Ուկրաինայում պատերազմը, ամենայն հավանականությամբ, կշարունակվի։ Չինաստանի առաջնորդի հետ Թրամփի «հոյակապ» հանդիպումը, գուցե, նոյեմբերին կայանալիք Կոնգրեսի միջանկյալ ընտրությունների «կանխավճար» է, բայց ի՞նչ կտա Պուտինին Ուկրաինայի դեմ պատերազմի ամառային շրջափուլը՝ խիստ անորոշ է։

Հայաստանի համար իրավիճակը կարող է ինտրիգային լինել։ Եթե անցյալ տարվա վաշինգտոնյան հայ-ադրբեջանական նախնական պայմանավորվածությունները Անքորջի «ոգու ծիրում» են, ապա ի՞նչ կարող է փոխվել, եթե Թրամփ – Պուտին գագաթաժողովից «ծուխն» է մնում։