Հունաստանի Հանրապետությունում Հայաստանի արտակարգ և լիազոր դեսպան Տիգրան Մկրտչյանը հարցազրույց է տվել Հունաստանի Հանրային հեռուստաընկերությանը՝ անդրադառնալով Հայաստանի եվրոպական օրակարգին, տարածաշրջանային զարգացումներին և հայ-հունական հարաբերությունների ամրապնդմանը։
«Սահմաններ» շաբաթական տեղեկատվական հաղորդումն անդրադարձել է Հայաստանին, որը նախորդ շաբաթ գտնվում էր եվրոպական քաղաքական ուշադրության կենտրոնում՝ հյուրընկալելով Եվրոպական քաղաքական համայնքի գագաթաժողովը Երևանում։
Հաղորդման շրջանակում Հունաստանի Հանրապետությունում Հայաստանի Հանրապետության արտակարգ և լիազոր դեսպան Տիգրան Մկրտչյանը անդրադարձել է տարածաշրջանում ձևավորվող նոր հնարավորություններին՝ ընդգծելով, որ Հայաստանի և Ադրբեջանի միջև խաղաղության հաստատումը կարևորագույն հանգրվան է ամբողջ տարածաշրջանի համար։
Դեսպանը նշել է, որ երկար տարիներ հակամարտությունն ու հաղորդակցությունների շրջափակումը զգալիորեն դանդաղեցրել էին տարածաշրջանային զարգացումը։ Այսօր, սակայն, ընթացող գործընթացները նոր հեռանկարներ են բացում Հայաստանի և ամբողջ տարածաշրջանի համար։ «Խաղաղության խաչմերուկ» նախաձեռնությունը կարող է տարածաշրջանը հակամարտության և դիմակայության գոտուց վերածել համագործակցության, փոխկապակցվածության և բարգավաճման տարածքի՝ Հայաստանը դարձնելով կարևոր տարածաշրջանային հանգույց։
Անդրադառնալով Հայաստան–Եվրոպական միություն հարաբերություններին՝ դեսպան Մկրտչյանը ընդգծել է, որ դրանք պատմականորեն գտնվում են բարձրագույն մակարդակի վրա։ Նա կարևորել է 2025 թվականին ընդունված՝ Հայաստանի՝ Եվրոպական միությանը հնարավոր անդամակցության գործընթացին վերաբերող օրենքը՝ նշելով, որ թեև Հայաստանը դեռ պաշտոնապես անդամակցության հայտ չի ներկայացրել, այդ քայլը հստակ արտահայտում է երկրի քաղաքական կամքը, եվրոպական ձգտումները և ռազմավարական ուղղությունը։
Հատուկ ուշադրություն է դարձվել նաև Հայաստան–Հունաստան հարաբերություններին, որոնք դեսպանի գնահատմամբ շարունակում են զարգանալ և խորանալ տարբեր ուղղություններով՝ պաշտպանությունից և քաղաքական երկխոսությունից մինչև մշակույթ, կրթություն և միջգերատեսչական համագործակցություն։
Դեսպանը նշել է, որ երկու երկրների միջև քաղաքական հաղորդակցությունը շատ ակտիվ է ինչպես վարչապետների և արտաքին գործերի նախարարների, այնպես էլ տարբեր նախարարությունների և պետական կառույցների մակարդակով։
Դեսպան Մկրտչյանը կարևորել է նաև համագործակցության ընդլայնումը տարածաշրջանային և տեղական մակարդակներում՝ ընդգծելով Սալոնիկիի և Հայաստան քաղաքների ու մարզերի միջև առկա մեծ ներուժը։ Նրա խոսքով՝ նման համագործակցությունը կարող է նոր բովանդակություն հաղորդել հայ-հունական բարեկամական հարաբերություններին և նպաստել գործնական ծրագրերի իրականացմանը։
Տեսանյութն՝ այստեղ
Բաց մի թողեք
Հայաստանն ու Լեհաստանը համաձայնագրով կկարգավորեն գաղտնի տեղեկությունների փոխադարձ պաշտպանության հարցերը
Բոլոր խոսակցությունները բնակչության վերադարձի մասին կոնֆլիկտածին են. Ռուբեն Ռուբինյան
ՌՈ պետ Աշոտ Զաքարյանը հեռանում է պաշտոնից